藍灣半島屬於柴灣大型私人屋苑,臨海而建,環境清靜。屋苑基座設有巴士總站、住客會所及購物商場,生活配套完善,而且半數單位享唔同角度海景,備受高質用家追捧。
藍灣半島位於小西灣道,喺2001年入伙,8座住宅大廈呈U形排列,約有3098個單位,規模冠絕同區私樓。藍灣半島戶型多元化,分層單位1至4房間隔,戶戶長廳設計;亦有連天台特色戶、相連及複式單位,迎合唔同檔次用家。要留意,屋苑臨海而建,各座前排單位享唔同程度海景,其餘單位主要望鄰近屋苑內園景。
作為東區龍頭屋苑之一,藍灣半島自設停車場,會所設施相當齊全,包括泳池、按摩池、網球場、籃球場等。另外,住客可以經樓下海濱長廊,直達鄰近小西灣運動場,途有有長廊廣場等地方,為住戶提供各式公眾康樂設施。
除此之外,藍灣半島基座為藍灣廣場,入面提供各式商舖,例如超市、特色餐飲、便利店、銀行等民生商舖,自給自足;住客日常買餸,最就腳可以去本灣市場,步程大約10分鐘。
交通方面,藍灣半島偏離鐵路沿線,住客出入勝在有巴士、小巴。巴士總站同小巴站設於屋苑基座,路線覆蓋北角、金鐘、中環、西九龍等地;另外,住客可以搭專線小巴去港鐵杏花邨站,配搭更靈活!呢度亦有通宵小巴往返旺角,迎合住客生活習慣。
至於校網選擇,藍灣半島屬於16校網,大約有14間學校供家長選擇,包括:筲箕灣官立小學、愛秩序灣官立小學、基灣小學等等。另外,東區中學有大約 30間,包括:港島民生書院、金文泰中學、張祝珊英文中學、庇理羅士女子中學等等。