當屋企虛位多，係咪一定搞到地方唔等使兼嘥位？今期《睇樓逐呎度》走訪大埔太湖花園嘅兩房單位，集齊咗窗台、玄關及走廊等「三大法寶」，但所佔面積唔算多，最多喺廳嘅窗台都12幾方呎，用嚟擺吓小飾物咁，反而係玄關面積近20方呎，足足等於大半個浴室，咁「大」撻地方，都唔知點用好…
單位實用面積451方呎，走進大門要經玄關才到廳堂，廳面積廣近160方呎，長15.11呎，加上通往寢區嘅走廊置中，客飯廳布局分明，其中以客廳較為闊，逾10.44呎，擺放家具容易。另大廳設有對流窗，室內空氣更通爽，但係樓底偏矮，只有超過8呎高，感覺較侷促。
2個睡房間隔四正，其中走廊盡頭嘅主人房，寬6.89呎，長8.08呎，放置雙人床後仍有充足活動空間。客房唔算細，面積近48方呎。廚房及浴室方面，以前者較有「睇頭」，面積53方呎，下廚空間充足。浴室則偏細，面積逾31方呎。
太湖花園係大埔較具規模嘅指標私人屋苑，鄰近港鐵太和站，分兩期發展，合共近2,500伙，設有戶外游泳池、網球場等設施。美聯周偉洪表示，太湖花園3月錄得約4宗租務成交，其中上述走訪單位嘅同類大兩房單位，早前以每月1.56萬港元獲租客承接，現時兩房租盤約有6個，細兩房單位最平1.25萬元。
[wzslider exclude=”22384″]資料來源: 東網on.cc