如果年輕人要上車搵樓，肯定聽過唔少人介紹將軍澳。由寶琳一帶直到坑口，其實都有唔少潛力上車盤。今次，我地要帶大家去到坑口附近一帶，睇下啲潛力盤啦。
坑口近年發展規劃越嚟越完善，交通生活配套充足，令早年興建係呢一帶嘅居屋，一躍成為唔少上車客嘅心頭好。好似眼前嘅煜明苑，係90年代嘅居屋，屬於和諧式設計，實用四正。屋苑有三座大廈組成，提供1824伙，實用面積介乎400至600幾呎左右。由於屋苑依山而建，所以觀感上密度較低，而且空氣清新，環境優美，部份單位仲有開揚嘅景致添，
而最受住戶歡迎嘅地方，就係煜明苑距離坑口站都只係幾分鐘嘅路程。而且附近巴士線路豐富，唔少地方都可以點對點直達，時間預算當然就更有把握。生活方面，附近TKO街市、東港城、南豐廣場等等嘅商場，都能夠滿足各種各類需求。
轉頭就嚟到坑口站附近另一個著名嘅居屋樓盤，安寧花園。安寧花園屬於私人參建居屋，所以外觀睇起上嚟，都甚有私樓風味。整個屋苑一共有六座物業，單位總數大約2300伙左右，而且廳房冇窗台，實用率極高，裝修佈置更加靈活。
安寧花園樓下有唔少區內小店，雜貨至食肆都有，附近南豐廣場，東港城，TKO Gateway同街市，亦有齊生活休閒所需。行到去坑口站，以上商場全部有有蓋天橋連接，非常方便。而屋苑最大賣點，就係鄰近坑口站，行過去都係兩三分鐘，附近嘅交通交匯處，亦有巴士同小巴往返九龍同西貢，一街之隔嘅南豐廣場，亦有機場巴士提供。如果係鍾意單車運動嘅住戶，仲可以去附近嘅單車館公園練習同休閒一番。
第三個要介紹嘅屋苑，真係喺單車館旁邊嘅居屋－廣明苑。廣明苑擁有七座物業，合共4200幾伙，屋苑屬於和諧式設計，有一房至三房間隔，適合唔同預算嘅年輕人選擇。由於廣明苑嘅位置啱啱坐喺坑口同將軍澳站之間，唔同座數嘅住戶，就可以自行選擇邊個站上車。前往兩個地鐵站，都只係大概8至10分鐘嘅步行時間，公司附近亦有多個交通中心，前往港九西貢等等嘅路線非常多選擇。
除咗剛才介紹嘅商場小店之外，住戶仲可以行到去附近嘅尚德廣場，以及將軍澳站上蓋嘅Popcorn購物消遣，食肆、名牌時裝應有盡有。