室內樓底高到底有乜好？一般嚟講都係「光猛、空氣流通、景觀開揚」等等好處，近嚟亦有網民具創意咁話「買高樓底嘅單位，等於去買嚿鬆糕，揀厚啲點都着數」。

有見及此，今期《睇樓逐呎度》參觀何文田皓畋嘅兩房單位，樓底足足高近10呎，港樓嚟講算係少有，照計玩高空發展，起多個「閣樓」都一樣得！

單位實用面積590方呎，全屋不設窗台，用盡室內空間，進入單位要經過玄關先到大廳，廳堂採長方形設計，長16.25呎，闊9.53呎，面積接近155方呎，兩房單位嚟講算係闊落。通往寢區嘅走廊置中，將客飯廳分隔，格局分明。另客廳外連露台，設玻璃趟門，計埋旁邊窗位，闊逾9.53呎，視野廣闊。

2個睡房與廳堂同一座向，空間唔算細，即使係客房面積亦逾52方呎，較普遍近年入伙新盤嘅客房好用，加上窗位用盡兩邊牆身，闊逾7呎，採光度十足。至於主人房面積逾100方呎，最煞食係長12.5呎，放置雙人床之後，兩邊落床冇難度；房內外連工作平台，但面積唔夠10方呎，僅容納1個人，實際用途不大。

廚房設於大門口旁邊，與飯廳連繫性強。廚房面積約45方呎，最大特色係設有約5呎闊窗戶，空氣流通。另浴室面積37方呎，開則勻稱。

皓畋坐落何文田半山，坐擁名校網優勢，雖然偏離港鐵站，但因會所設施齊全，自去年底入伙後租務活躍。美聯羅潔儀指，過去2個月共錄130宗租賃成交，現時放租盤不足50個，大部分為兩房單位，上述單位同類租盤最平叫租2.3萬港元。

資料來源:東網on.cc