坐擁香港後花園嘅天水圍區，一向都係愛寧靜同埋追求健康生活人士嘅聚居點。 如果你欣賞天水圍呢一點，並且打算喺度定居嘅話，咁樣今集介紹嘅內容，你就唔能夠錯過啦！

由長江實業發展嘅嘉湖山莊，屬於區內旗艦級屋苑， 58座物業，提供接近16,000個單位，以2-3房為主打，面積介乎四百幾至六百幾呎， 嘉湖山莊佔地達400萬平方呎，而當中近9成，即係360萬呎屬於綠化帶，比例全港最高！ 而當中亦有天水圍公園，綠樹成蔭，鳥語花香，附近有大量體育場地，整體休閒空間可謂區內屋苑之冠。生活方面，嘉湖山莊有自設商場，佔地達66萬尺，生活娛樂全部齊備。 屋苑亦提供接駁巴士，接載每期嘅住戶前往天水圍站，都相當方便。

如果閣下鍾意呢度嘅環境，但又想搵啲性價比高啲嘅屋苑，旁邊嘅天頌苑，都係唔錯嘅選擇。屋苑15座物業座擁超過6000個單位，戶型變化多，由開放式至三房間隔都有，面積介乎400至600幾呎！雖然天水圍公園附近都有幾個屋苑，但係如果以居屋嚟計，最近始終都仲係天頌苑，而且規模之大，亦只係僅次嘉湖山莊。交通方面，由於天水圍建設嘅時候，輕鐵站差不多直達每一個屋苑，加上大馬路亦有唔少港九巴士經過，所以往來交通非常方便。

如果閣下想搵居屋，又係九晚五上班一族，咁就要介紹埋天盛苑 先講基本資料，天盛苑由17座物業組成，擁有接近6,600個單位，喺香港現時規模最大型嘅居屋屋苑。當中有13座屬於私人屋苑格局嘅康和式設計，有4座屬於公屋格局嘅和諧式設計， 雖然以地利比較，屋苑旁邊仲有一個天祐苑，不過由於佢得1800幾個單位，所以用放盤量計，天盛苑交投就顯得更易入手。 屋苑規模大，當中亦有自己嘅綠化園林，亦都算得上係清靜怡人，令到附近嘅住戶，都會羨慕佢哋擁有自己嘅私人休憩空間

樓下屋苑嘅天盛商場，喺區內嘅大型商場，旁邊仲有天耀商場，向上行多幾分鐘，又有嘉湖山莊嘅大型商場，選擇多元化。 加上呢度同天水圍站只係一街之隔，返工返學，出門上落都非常方便 今集介紹係咁多，仲想知多啲？立即按此查詢！