屯門，相信係唔少年青人上車嘅第一個搜尋地點！全因為呢區嘅樓價門檻較低，令到唔少置業人士前來尋寶。我哋今集，就聚焦喺屯門河同蝴蝶灣一帶嘅上車靚盤。

屯門私樓眾多，唔少都主打細碼上車盤，啟豐園就特別受到關注。92年入伙嘅啟豐園，有四座物業，合共896個單位，統一兩房間隔。同一般上車盤相比，除咗間隔設計實用之外，行落樓下就係屯門海濱！加上唔少單位可以望到開揚海景，絕對係大大嘅加分位。屋苑基座亦自設商場，地鋪亦有各式食肆店鋪，滿足住戶日常生活需求，而且屋苑旁邊就有蝴蝶灣公園，泳灘，燒烤場等等設施，生活指數相當高。屋苑隔離就係屯門碼頭總站，所以輕鐵、巴士等等選擇非常多，交通亦算方便。

距離啟豐園大約5分鐘路程，就係第二個介紹嘅居屋屋苑，兆山苑。兆山苑由12座物業組成，提供1872個單位，屋苑主打兩房單位，全部不設窗台，間隔四正，以實用取勝。生活方面，上車客經濟消費以實用為先，喺旁邊蝴蝶邨嘅商場同街市，能夠提供晒一切平民日常消費所需。平日行去海濱散下步，或者去泳灘游下水，都算得上係寫意人生。交通方面，樓下就係輕鐵蝴蝶站，仲有巴士、小巴直出旺角、荃灣、油塘等地
又或者行大約8分鐘，去到屯門碼頭總站，更多輕鐵路線以及巴士選擇。

不過講到上車居屋，就不得不提屯門居屋王 － 富健花園，富健花園屬於私人參建居屋，係1999年落成，屬於區內年輕嘅居屋屋苑。屋苑一共有12座物業，提供3026個單位，主打兩至三房間隔，完全迎合上車需要
富健花園沿着屯門河而建，環境寫意寧靜，大部份單位都可以享受到屯門河嘅美景，而且屋苑內園超過8萬呎，生活密度比同區唔少私樓更低！樓下大量特色地舖，亦令到屋苑擁有自成一角嘅購物圈。旁邊嘅新屯門商場，提供更多元化嘅購物選擇，亦係屋苑嘅購物熱點之一。富健花園鄰近輕鐵站，行5分鐘就可以去到龍門居嘅巴士總站，出行都非常方便。

想了解多啲關於以上屋苑嘅資訊？歡迎向我們的在線客服查詢！