有人話「無敵是最寂寞」,但事實上置身於今次《睇樓逐呎度》走訪荃灣環宇海灣嘅露台,先感受到真正嘅寂寞……事關呢個單位嘅露台地方狹窄,面積只有11.5方呎,闊度僅僅2.7呎,絕對稱得上係「一個人的露台」,認真係「奇則」呀!
呢個3房單位實用面積566方呎,採3房1廁設計,樓底高逾8.8呎。甫入屋要經過長近7呎嘅走廊先到達大廳,略嫌「嘥位」。廳堂呈長方形,面積146方呎,加上不設窗台,地方見使好用。而客廳外連闊逾8.6呎露台,並以落地玻璃趟門相隔,引景入室,採光度十足。
至於3個睡房偏細,全部設有長窗台,其中2個客房皆只有約44方呎,地方略嫌淺窄,要利用窗台位擺床增加走動空間;主人房面積較大,約68方呎,配以闊窗,滿室光猛明亮。廚房及浴室開則勻稱,小家庭夠用。
美聯梁仲維稱,上述環宇海灣「細3房」單位放盤少,由於中低層單位景觀受前面海灣花園所擋,只能側望海景,故叫價較相宜,最低消費890萬港元;極高層單位則高過海灣花園,享開揚海景,最平叫價1,038萬元。
他續說,雖環宇海灣SSD期已屆滿,新近有同類3房戶以700萬元易手,惟因同類盤源少,業主叫價仍硬淨。
環宇海灣係荃灣西樓齡最新嘅大型私人屋苑,落成逾2年,由7座大廈組成,設有大型會所,大人細路都啱玩。屋苑離港鐵荃灣西站10分鐘步程,加上鄰近消費熱點荃新天地,生活便利。
[wzslider exclude=”13555″]資料來源:東網on.cc(2017年7月30日)