屋企採用多窗設計，其實係好事嚟嘅，既光猛啲又通風啲……但今期《睇樓逐呎度》參觀筲箕灣i‧UniQ譽都嘅一房單位，大廳原本已設有逾8呎窗口，採光度照計就好充足，但近廚房嘅牆身居然多個近3呎嘅「神秘窗」，直望廚房對出嘅工作平台，到底有啲咩作用呢？
單位實用面積298方呎，甫入大門口要經過玄關才進入廳堂，廳長15.24呎，但玄關長度佔其中逾6呎，加上近窗位置嘅廳堂僅闊7.77呎，空間唔算寬敞，只能放置簡單家具。玄關闊3.47呎，最多放到1個書櫃，實用性唔高。不過，走訪單位樓底高達10.78呎，只要善用高空優勢，蝸居細細一樣好住。
單位另一失色之處係廳堂及房間均設有窗台，長度分別為8.54呎及6.26呎，略嫌「嘥位」。房間採套房設計，長9.11呎、闊6.64呎，宜善用窗台位，擴闊房內空間。套房浴室不設出入口進出廳堂，如果有客人到訪嘅話，要經過主人房才可如廁。另單位設獨立廚房，擺放廚櫃後地方淺窄，外連工作平台僅約17方呎，僅夠晾曬衣物。
i‧UniQ譽都坐落筲箕灣道，樓齡僅5年，交通及生活配套完善，加上設有小型會所，迎合年輕上班族。美聯周永業表示，新近有同類一房單位以月租1.7萬港元租出，現時同類入門租盤最平約1.78萬元。
[wzslider exclude=”22356,22358″]資料來源: 東網on.cc