讀者來信
Anthony Sir 你好!最近睇新聞,話租金回報跌咗好多,尤其是新樓,租金回報隨時得兩厘,專家分析話租金回報低代表樓市有風險,是這樣嗎?還是新樓租金特別低呢?
回覆讀者來信
新樓租金偏低好正常…
租金回報 = 每年租金 ÷ 樓價
如果想租金回報高,好簡單…
(1) 租金高 或 (2) 樓價平 或 (3) 兩樣齊晒
新樓的租金回報,一般都會偏低!
簡單問一個問題:「新樓貴?定二手樓貴?定舊樓貴?」
相信個個都識答:「肯定新樓貴啦!」
原因是甚麼?新?其中一個原因…
如果兩者的價錢一樣,質素一樣,有得揀,大部份都鍾意新樓,這是人之常情!冇人住過嘛,第一手嘛,即是貴啲都會買啦!
另一個原因,大家都忽略了,就是新樓的銷售策略!
先講硬件,睇新樓的時候,你睇的是示範單位,一般都不在樓盤現場,而是在高級商場、寫字樓,你亦不會看到這個小區真實的一面,對面有工廠?樓下有街市?遠望見墳場?通通都見唔到!單位的景觀都係段估有辛苦。睇到的永遠都是最好的一面,美侖美奐的單位裝修、樓盤模型,還有廣告影片裡,都是來自歐美的俊男美女,誰知入伙之後,周圍只聽到廣東話與普通話!XD
再講軟件,各大行都派出大量精英,幾個人服待你一個,前期的電話攻勢、現場的撈客攻勢、展銷廳內左右夾攻,還有現場無數的人群氣氛助攻,購買意欲自然高漲,如此費盡心思讓你擁有一個完美的置業夢,貴啲都值丫!將來你賣二手會有這些部署嗎?所以新樓樓價一般都會偏高,我們稱之為溢價。
另一方面,租金又會低,點解?
二手樓放租,一個屋苑,最多得幾十個,甚至得幾個放盤。新樓呢?入伙的時候,是幾百伙甚至過千伙一齊入伙的,假設當中有 1/3 是投資者會放租,隨時有百幾個甚至更多放盤,你想快啲租出?識做啦!減價!所以新盤劈租是正常的現象!
新樓 (1) 樓價偏高 (2) 租金偏低,回報自然低,很正常!
其實很多二手樓都有 3 厘以上的回報,如果你買舊樓的話要收到 4 厘以上回報是正常的事,再加上香港的利息偏低,所以即使租金回報不高,仍然有很多人搶着要買樓。