艺人袁伟豪及张宝儿联名买楼,唔通要嚟筑爱巢,为结婚准备?据土地注册处显示,袁伟豪同张宝儿以联名形式,以6,568.3万元买入清水湾豪宅新盘傲泷一个花园复式单位,实用面积2,205平方呎,连568平方呎私人花园,呎价近3万!另外,佢哋再以400万买入两个车位,加加埋埋使咗约7,000万!
其实,张宝儿喺2017年时已经购入傲泷一个细单位,早前先将物业转畀妈妈。今次袁伟豪以首置身份入市,印花税缴税279万元,悭咗706万元辣税!
东网问到袁伟豪买楼一事,佢话:“系畀大家将来用,当大家一齐投资,自住又好投资又好,系一个开始!(爱巢都买埋,几时好日子?)有好消息会通知大家。”咁啱今日系袁伟豪正日生日,真系一份大礼呀! 宝儿受访时话:“今次两个一齐置业,呢个单位价值不菲,唔系一个人就畀到,大家都要努力揾钱,畀大家未来有个目标。(今日男友生日,有咩惊喜畀佢?)呢个新闻已经系一个惊喜!(下半生交畀袁伟豪?)个单位虽然价值不菲,但我先系无价!(好日子定咗未?)有好消息再同大家报告。”
两人联名买入傲泷一个花园复式单位,呎价近3万!
袁伟豪话系将来用!
资料来源: 东网 on.cc