读者来信
Anthony Sir 你好!之前有睇你的 YouTube Channel 第一桶金介绍买大陆楼,我都好有兴趣,但阿爸阿妈非常反对,他们说大陆楼的管理好差,好快残,十年楼就好似香港四十年楼,将来要卖就难了,真的吗?个个盘都咁差?
回复读者来信
以前大陆楼的管理质素的确好差!
楼的质素固然麻麻,最重要是管理质素差,例如漏水又唔理、地面有积水又唔抹、天花墙身落当睇唔到,到处都是磞烂花,感觉甩头甩骨!大堂走廊电灯坏咗又唔整,成日乌灯黑火闪吓闪吓,罗兰姐出场拍鬼片咩?电梯又成日坏,数量又唔够,日日上落排长龙,近年仲多一样难搞的,快递!个个住户都网购,送来的速递通地放,大堂变咗集运站,管理员照样懒懒闲…
然而近十年的新楼盘,管理质素有非常明显的提升!
有炒股票的朋友都知道,内房物管股这板块,近年在市场上好受欢迎,股价越升越有,不是乱炒的,物管水平确实进步很大!
记得早几年超强台风山竹来袭,香港、澳门、珠海市面被蹂躏,周围好似打完仗咁,有些冧树残骸今年还未处理好呢!当时我忽然想起,其中一个珠海单位是有海景的!肯定会被强风迎面进击!当时单位冇人住,打完风使唔使过去睇吓有冇爆玻璃呢?唔使啦!有管家服务嘛!
现在很多优质屋苑,每座楼都会安排一个管家为业主服务!
我只要发个微信给管家,请他入屋睇睇,然后他会拍段视频发给我,睇完!冇事!如果有事又点呢?可以叫管家帮手安排工人维修及清洁,实报实销,完成之后又发给你一段视频,到时微信俾番钱佢就可以了,又系足不出户就搞掂,很方便!
另外管理处也会不时 Update 你屋苑的状况,例如灭蚊、除草,又或者有住户聚会等,都会透过微信通知你,即使你不在那里都可以清楚了解到物业的状况!以前那些甩头甩骨,电灯电梯成日坏的问题已不复存在了,收楼三年了,直到最近卖出单位,仍然新的一样,买家对物业的保养完全冇炸型!
近年很多大屋苑,卖楼的时候都已经要交维修基金,也调整了管理费,加上新一代人比较重视生活质素,所以物业管理水平都有明显提升,至于二手屋苑是否有改进呢?就很视乎业主组织是否能说服其他业主多付一点钱,去令大厦变得更好了,你备的!很多业主未必有这种眼光,视钱如命,那就没办法了!
所以千万不要说,一手楼有溢价,二手楼有折让,抵买好多!视乎平几多啦,如果平一半,确实有着数,如果平唔够成就唔抵啦,质素差好远!将来有机会一齐上大陆睇吓楼啦!