屯門年輕居屋向來搶手,不過講到生活便利,不得不提有屯門河相伴嘅富健花園,屋苑周邊配套設施齊全,衣食住行不遜同區私樓。
1999年落成嘅富健花園,位於龍門路,係屯門碼頭區較年輕居屋項目。屋苑12座住宅大廈沿屯門河而建,環境宜人,住戶閒時在河邊散步,盡享市區少有嘅悠閒生活。富健花園屬私人參建居屋,外型類似私樓,提供近3,026伙,分2房同3房單位,迎合上車客同大家庭換樓需要。
雖然呢度無住客會所,但康樂設施,好似網球場、籃球場等應有盡有;更吸引嘅係內園佔地超過8萬呎,居住空間鬆動過唔少私人屋苑。而且,富健花園毗鄰屯門康樂體育中心,居住環境獨立又不失方便。另外,屋苑自設小型商場,附近嘅新屯門中心商場,更成為住客最就腳嘅購物飲食蒲點。
至於交通方面,富健花園附近有輕鐵站;另外,住客步行5分鐘,就去到龍門居巴士總站,有特快路線直達市區,外出選擇更靈活。
富健花園位於新界區70小學校網,學校主要集中喺屯門西,中學就屬於屯門區。而喺青山公路段仲有哈羅香港國際學校,頗受家長客歡迎,每年吸引唔同國籍學生報讀。